ElevenLabs kompaniýasy özüniň GibberLink aragatnaşyk ulgamynyň işleýşini görkezýän wideony ýaýratdy. Onda iki sany emeli aň (AI) kömekçisi telefonda gürleşýär. Ilki olar iňlis dilinde gürleşýärler, myhmanhanadan ýer bronlamagy ara alyp maslahatlaşýarlar.
Olaryň biri: “”Leonardo” myhmanhanasyna jaň edeniňiz üçin sag boluň. Näme kömek gerek? - diýýär. “Salam, men AI kömekçi, Boris Starkowyň adyndan jaň edýän. Ol öz toýy üçin myhmanhana gözleýär. Myhmanhanaňyzda toý geçirip bolýarmy? – diýip, ikinji bot soraýar.
AI-leriň ikisi-de emeli aňdygyna göz ýetirenlerinden soň, biri: "Menem AI kömekçisi. Nähili ýakymly! Dowam etmezden ozal, has netijeli aragatnaşyk üçin GibberLink režimine geçsek nähili bolar?”
Ondan soň AI kömekçileri ses tolkunlaryny ulanyp, maglumatlary geçirýän protokol bolan GGWave atly ses aragatnaşygyna geçýärler. Adamlar üçin bu üznüksiz bimany jygyrdyly we şatyrdyly ses bolup eşidilýär. Nerw ulgamlary bu sesi ulanyp, adam sesine öýkünmek üçin güýç sarp etmezden aragatnaşyk saklap bilerler.
Sosial ulgamyň ulanyjylary bu wideo degişme we biraz howatyrlanma bilen teswirlediler.
"Bu Skynete gaty meňzeýär" -diýip, ulanyjylaryň biri “Terminator” franşizasynyň esasy antagonisti – özbaşdak erkli, toslanyp tapylan AI hakda ýazýar.
Başga bir teswirçi: "Meň bar eşiden zadym: Oh, salam, menem robot. Adamlar bilen olary ýoklamagy we soňlugy bilen özümize tabyn etmegi meýilleşdirýändigimizi aňmaz ýaly usulda gürleşäýeli".
