BMW kompaniýasy Walentino Rossiniň hormatyna ýörite «M4 CS Edition VR46» modelini hödürledi. Motorsport boýunça ýaryşlarda dokuz gezek dünýä çempiony bolan Rossi 16-njy fewralda 46 ýaşady.
Täze M4 iki dürli görnüşde taýýarlanar – Sport we Style. Iki görnüşinde-de Rossiniň meşhur 46 belgisi ýerleşdiriler we sary reňkli aýratyn bezegler bolar. Şeýle-de käbir grafiki elementler el bilen çyzylyp bezeler. Awtoulagyň içinde-de ýörite nyşanlar we sary reňkli bezeg dekorlary ýerleşdiriler.
Tehnika tarapdan seredilende, M4 CS Edition VR46 modeli 550 at güýjündäki adaty CS kupe bilen meňzeşdir. Bu model 100 km/sag tizlige bary-ýogy 3,4 sekuntda ýetýär. Iň ýokary tizligi bolsa 302 km/sag. Emma inženerler ulagyň şassisine käbir üýtgeşmeleri girizipdirler: ýaýlar, stabilizatorlar we uýgunlaşdyryjy amortizatorlar üýtgedilip, tekerleriň burçy täzeden sazlanypdyr.
Bu ýörite modelden jemi 92 sany öndüriler. Her görnüşden 46 sany awtoulag satuwa çykarylar. ABŞ-da ulagyň başlangyç bahasy 155 müň dollar bolar.
Ulagy satyn aljaklara goşmaça sowgatlar hem göz öňünde tutulýar. Olar Italiýada Walentino Rossiniň fermasyna iki günlük gezelenç etmäge, şeýle-de Emiliýa-Romanýa sebitindäki meşhur Mizano ýaryş meýdançasynda ýörite trek-gününe gatnaşmaga mümkinçilik gazanarlar. Häzirki wagtda Rossi BMW M zawod toparynyň düzüminde uzak aralyga niýetlenen ýaryşlara gatnaşýar.
