Alymlar Gizadaky Beýik piramidanyň elektromagnit tolkunlary bilen üýtgeşik täsirleşýändigini we äpet energetiki rezonatoryň wezipesini ýerine ýetirýändigini ýüze çykardylar.
4600 ýyllyk ägirt uly desga bilen geçirilen barlaglarda, onuň belli-belli nokatlarda energiýany jemleýändigi we güýçlendirýändigi ýüze çykaryldy. Has takygy, bu ýagdaý Patyşanyň otagynda, Şa zenanyň otagynda we piramidanyň aşagyndaky tamamlanmadyk otagda has aýdyň görünýär.
Bu açyş elektromagnit tolkunlaryny kabul edýän we olary güýçlendirýän rezonator hökmünde piramidanyň ýörite gurlandygy baradaky pikiriň döremegine sebäp boldy.
Aerokosmiki inžener Kristofer Dann onlarça ýyl bäri piramidalary öwrenip gelýär. Ol Gizadaky Beýik piramidanyň aslynda ýokary tehnologiýaly enjam bolup biljekdigini öňe sürýär. Dann piramidanyň demirgazyk şahtasynyň gurluşyny mikrotolkunlary we elektromagnit energiýasyny geçirmek üçin ulanylýan häzirki zaman gurluşlaryna meňzedýär. Hünärmen piramidanyň içinde bolup biljek aýratyn mehanizm barada şeýle pikir ýöretdi: desganyň içine belli bir wagtda iki dürli himiki madda girizilip bilner we maddalar biri-biri bilen garyşanda bug emele getirip, netijede wodorod döredip biler. Ol bu hadysanyň piramidanyň içinde energetiki rezonansy döredip, käbir täsirleri ýüze çykaryp biljekdigini öňe sürýär.
