25-26-njy fewralda Doha şäherine türkmen-katar parlamentara dostluk toparynyň mejlisi geçirildi. Oňa gatnaşmak üçin Türkmenistanyň Mejlisiniň wekilleri Katar Döwletine iş saparyny amala aşyrdylar.
Türkmenistanyň milli Parlamentiniň metbugat gullugynyň habar bermegine görä, 25-nji fewralda türkmen wekiliýetiniň hem-de Türkmenistanyň Katar Döwletindäki ilçisiniň gatnaşmagynda köpçülikleýin habar beriş serişdeleriniň merkezinde «Al Shark» gazetiniň baş redaktory Jaber Salem Al-Harmi bilen duşuşyk geçirildi.
Duşuşygyň dowamynda türkmen tarapy ýurdumyzyň içeri we daşary syýasatynyň ileri tutulýan ugurlary, milli Parlamentiň düzümi hem-de dürli ulgamlarda amala aşyrylýan giň gerimli durmuş-ykdysady özgertmeleri kanunçylyk taýdan üpjün etmek boýunça alnyp barylýan işler bilen tanyşdyrdy.
Şeýle hem türkmen wekiliýeti Kataryň Şura Geňeşiniň Başlygy Hasan bin Abdulla Al Ganim bilen duşuşdy. Ol dostluk toparynyň işine ýokary baha berip, Türkmenistanyň wekiliýetiniň bu saparynyň iki ýurduň kanun çykaryjy edaralarynyň hyzmatdaşlygyny berkitjekdigini nygtady.
