Prezident Serdar Berdimuhamedow Türkmenistanyň halkynyň we Hökümetiniň adyndan, şeýle hem hut öz adyndan Ýaponiýanyň Imperatory Naruhito Ýaponiýanyň milli baýramy we Onuň Alyjenabynyň doglan güni mynasybetli tüýs ýürekden gutlaglaryny, iň gowy arzuwlaryny iberdi. Bu barada TDH habar berýär.
Döwlet Baştutany iki ýurduň arasyndaky yzygiderli pugtalanýan gatnaşyklaryň ýokary derejesiniň guwandyryjydygyny belläp, syýasy, söwda-ykdysady, medeni-ynsanperwer we beýleki ugurlar boýunça ýola goýlan özara bähbitli hyzmatdaşlygyň dostlukly halklarymyzyň bähbidine mundan beýläk-de ösdüriljekdigine berk ynam bildirdi.
Mümkinçilikden peýdalanyp, Serdar Berdimuhamedow Imperator Naruhito tüýs ýürekden berk jan saglyk, bagtyýarlyk, abadançylyk, Ýaponiýanyň ähli halkyna bolsa parahatçylyk, mundan beýläk-de ösüş, rowaçlyk arzuw etdi.
Naruhito Ýaponiýanyň 126-njy Imperatory. Ol 1960-njy ýylyň 23-nji fewralynda Tokioda Imperator köşgünde Ýaponiýanyň mirasdüşer şazadasy Akihitonyň we onuň maşgalasy şazenany Mitikonyň maşgalasynda dünýä indi.
