23-nji fewrala geçilen gije Er-Riýadda (Saud Arabystany) uly boks agşamy geçirildi. Onuň esasy wakasy ýarym agyr agramda absolýut dünýä çempiony, russiýaly Artur Beterbiýew bilen bu diwizionda öňki dünýä çempiony Dmitriý Biwolyň arasyndaky rewanş söweşi boldy. Bu söweş emin agzalarynyň aglabasynyň karar bermeginde Biwolyň ýeňiş gazanmagy bilen tamamlandy.
Başlangyç raundlarda artykmaçlyk, esasan, Biwolyň tarapynda boldy, ýöne söweşiň ortasynda Beterbiýew güýjüni jemläp, Biwolyň kellesine we bedenine birnäçe gezek güýçli urgy urdy.
Ýedinji raunddan Biwol bilen Beterbiýew işjeň hereket edip, biri-birinden artykmaçlygy almaga synanyşdy. Ahyrky raundlar hem bäsdeşlik ýagdaýynda geçdi we netijede söweş bellenilen 12 raund dowam etdi. Şondan soň eminler Biwolyň peýdasyna şeýle hasaby çykardy – 114-114, 116-112, 115-113.
Şeýlelikde, Biwol ýarym agyr agramda absolýut dünýä çempiony boldy.
Artur Beterbiýew üçin bu ýeňliş professional karýerasynda ilkinji boldy. Bu söweşden öň 40 ýaşly Beterbiýew ýeňilmezek söweşijidi. Indi onuň hasabynda 21 ýeňiş bilen bir ýeňliş bar.
Dmitriý Biwol jemi 24 söweşde ýeňiş gazandy, şolaryň 12-si möhletinden ir tamamlandy. Şeýle-de, onuň hasabynda Beterbiýew bilen soňky söweşinde bolan ýekeje ýeňlişi bar.
