Google amerikan kompaniýasy Gemini 2.0 modeliniň esasynda işlenip taýýarlanan täze emeli aň ulgamyny işe girizýär. Ol alymlara täze ylmy çaklamalary döretmekde kömek eder diýlip, kompaniýanyň relizinde habar berilýär.
“Şu gün Google täze çaklamalary we ylmy gözlegleriň meýilnamalaryny döretmekde alymlara kömek etmek üçin niýetlenen we Gemini 2.0 modeliniň binýadynda işlenip düzülen täze emeli aň ulgamyny – AI co-scientist-i işe girizýär” – diýlip, kompaniýanyň habarynda aýdylýar.
AI co-scientist ylmy prosesi imitirleýän birnäçe EA agentlerini ulanýar: biri pikir döretmäge, beýlekisi olary gözden geçirmäge, seljermäge we syn bermäge ýöriteleşýär. EA erkin elýeterli bolan ylmy makalalardan we ýörite maglumatlar bazalaryndan maglumat alyp bilýär. Soňra alnan maglumatlary seljerýär we düşündirişler hem çeşmelere salgylanmalar bilen teklipleriň sanawyny döredýär.
Google-yň täze guralynyň Stenford uniwersitetiniň, Londonyň Imperiýa kollejiniň hünärmenleri bilen geçirilen irki synaglary onuň geljegi uly ylmy çaklamalary döredip biljekdigini görkezdi.
Google täze AI co-scientist ulgamyny hünärmenlere maglumat ýygnamaga we öz zähmetini doly amala aşyrmaga kömek edýän özara gatnaşyk guraly hökmünde kesgitleýär. Şol bir wagtyň özünde, ol ylmy prosesi awtomatlaşdyrmak üçin niýetlenen däldir.
Google öz gözleg ulgamy bilen Alphabet holding kompaniýasynyň düzümine girýär. Şeýle-de, bu holdingiň düzüminde Android we YouTube, Google Life Sciences, Calico, Sidewalk Labs, Nest, Google Ventures, Google Capital we Google X bar.
