Google eýýäm 2027-nji ýylda kosmos giňişliginde maglumat merkezleriniň gurluşygyna başlamagy meýilleşdirýär. Suncatcher atly taslama köp energiýa sarp edýän maglumat merkezlerini elektrik energiýasy bilen üpjün etmek üçin Gün energiýasyny has netijeli ulanmagy maksat edinýär diýip, Google-yň baş direktory Sundar Piçai habar berdi.
“Biziň uly maksatlarymyzyň biri – häzirki günde Ýerde öndürýänimizden 100 trillion esse köp bolan Gün energiýasyny netijeli ulanmak üçin kosmosda maglumat merkezlerini gurmak” – diýip, Piçai belledi.
Taslamany durmuşa geçirmek üçin ilkinji ädimler 2027-nji ýylyň başynda başlar. Google hemralaryň kömegi bilen Ýeri surata düşürmäge ýöriteleşen Planet kompaniýasy bilen bilelikde Ýere golaý orbitada enjamlary barlamak üçin iki synag hemrasyny uçurar.
Piçai kosmos maglumat merkezleriniň täze standarta öwrüljekdigine ynam bildirdi. “Men, çen-takmyn, on ýyldan soň muňa maglumat merkezlerini gurmagyň adaty usuly hökmünde garajakdygymyza ynanýaryn” – diýip, ol belledi.
Google kosmosy maglumat merkezleriniň energiýa meselesiniň çözgüdi hökmünde görýän ýeke-täk kompaniýa däl. Mundan öň Starcloud startapy kosmosa ilkinji emeli aňly hemrany uçuryp, kosmosda ýerleşýän maglumat merkezlerinden kömürturşy gazynyň zyňyndylarynyň ýerdäki merkezlerden 10 esse az boljakdygyny çaklady.
Maglumat merkezleri tarapyndan elektrik energiýasynyň sarp edilişi emeli aňy ösdürmek üçin hasaplaýyş güýçleriniň artdyrylmagy sebäpli alada döredýär. ABŞ-nyň Energetika ministrliginiň hasabatyna görä, 2023-nji ýylda maglumat merkezleri ýurduň elektrik energiýasynyň 4%-den gowragyny sarp etdi, 2028-nji ýyla çenli bolsa bu görkeziji 12%-e ýetip biler.
