NASA-nyň Perseverance mars roweri Ýezero krateriniň günbatar bölegindäki Lac de Charmes diýlip atlandyrylýan sebitde, gadymy Mars peýzažynyň öňünde täze selfi düşürdi. Bu surat 2026-njy ýylyň 11-nji martynda (missiýanyň 1797-nji mars güni) alyndy we ol 61 sany aýry-aýry şekiliň birikdirilmeginden ybaratdyr.
NASA-nyň habar bermegine görä, bäşinji ylmy kampaniýanyň dowamynda aparat Marsyň ýüzüniň iň gyzykly künjekleriniň birini öwrenýär. Lac de Charmes diýen ýerde mars roweri Ýezero krateriniň emele gelmezinden ozal dörän bolmagy ähtimal bolan gadymy wulkanik jynslaryny ýüze çykardy.
Arethusa meýdançasynda enjam magmatik minerallary bolan jynslary öwrendi. Alymlar bu maglumatlaryň Marsyň irki geologik taryhyny öwrenmäge kömek etjekdigine ynanýarlar.
Arbot sebitinde Mastcam-Z kamerasynyň kömegi bilen 46 suratdan ybarat bolan täze panorama döredildi. Onda takmynan 3,9 milliard ýyl ozal bolup geçen güýçli meteorit zarbasyndan soň zyňlan äpet jyns bölekleri — megabrekçiýalar görünýär.
«Bu suratlarda, ähtimal, bütin missiýamyzyň dowamynda öwrenjek iň gadymy jynslarymyz görkezilendir» — diýip, missiýanyň ylmy ýolbaşçysynyň orunbasary Ken Farli belledi.
Marsda bäş ýyldan gowrak wagtlap işläp gelýän Perseverance şu wagta çenli takmynan 42 kilometr ýol geçdi. Bu bolsa adaty marafon aralygyna örän golaýdyr.
Taslamanyň ýolbaşçysynyň wezipesini ýerine ýetiriji Stiw Li mars roweriniň tehniki ýagdaýynyň guratdygyny we onuň Gyzyl planetanyň ýüzüni barlamaga dowam etjekdigini mälim etdi.
