Fransiýanyň Renault awtoöndürijisi bilen hytaý holdingi Zhejiang Geely Holding Braziliýada zyňyndysy nol we pes derejeli awtomobilleriň bilelikdäki önümçiligi we satuwy barada şertnama baglaşylandygyny mälim etdiler. Bu hyzmatdaşlyk kompaniýalaryň ikisine-de Latyn Amerikasynyň bazarynda orunlaryny berkitmäge mümkinçilik berer.
Ylalaşygyň netijesinde Zhejiang Geely kompaniýasy Renault do Brasil bölümçesiniň täze hyzmatdaşyna öwrüler. Şol bir wagtyň özünde, hytaý kompaniýasy San-Žoze-dus-Pinýaýs şäherinde (Parana ştaty) ýerleşýän Ayrton Senna senagat toplumyna elýeterli bolar.
Mundan başga-da, Renault do Brasil öz satuw ulgamlaryndan peýdalanyp, ýurtda Geely elektrik we gibrid awtomobilleriniň resmi distribýutory bolar.
Renault bilen hyzmatdaşlyk Geely kompaniýasyna ekologiýa taýdan arassa awtomobillere islegiň artýan ýeri bolan Latyn Amerikasynyň bazaryna çykmaga mümkinçilik berýär.
Belläp geçsek, Renault bilen Geely-nyň eýýäm birnäçe bilelikdäki taslamasy bolup, olaryň arasynda Günorta Koreýadaky awtomobil önümçiligi hem-de gibrid we gaz awtomobilleri üçin ekologiýa taýdan arassa hereketlendirijileri işläp taýýarlaýan Horse Powertrains bilelikdäki kärhanasy bar.
