Xiaomi kompaniýasy Hytaýyň DeepSeek çat-botuny öz smartfonlaryna goşmagy meýilleşdirýär. Häzirki wagtda öndüriji Xiao AI ses kömekçisiniň DeepSeek-R1 neýroulgam modeli bilen laýyklygyny barlaýar diýip, XiaomiTime portaly habar berýär.
Dil modeli ulanyjylara ses buýruklarynyň kömegi bilen EA funksiýalaryny ulanmaga mümkinçilik berýän HyperOS 2 operasion ulgamynyň dolandyrmagynda işleýän gurluşlarda synag edildi.
Funksiýanyň heniz doly işlenmändigine garamazdan, Xiaomi eýýäm DeepSeek-e esaslanýan Super Xiaoai kömekçisiniň smartfonlaryň we planşetleriň 25 modelinde elýeterli boljakdygyny habar berdi. Sanawa Xiaomi 15 we 15 Pro, Xiaomi 14 Ultra gurluşlary, Redmi K70 we K80 smartfonlary, eplenýän MIX Fold 4 we MIX Flip, şeýle-de Xiaomi Pad 7, 7 Pro we Pad 6S Pro 12.4 planşetleri girdi.
Başlangyç synag döwri tamamlansa-da, EA funksiýalary ulanyjylar üçin wagtlaýyn elýeterli däl. Sebäbi kompaniýa DeepSeek-iň hil we ygtybarlylyk ülňülerine laýyk gelýändigine göz ýetirmek isleýär.
Mundan öň DeepSeek-i öz gurluşlaryna goşmak meýilnamalary barada Huawei, Honor, Oppo, Vivo, Meizu, Lenovo we Nubia ýaly hytaý öndürijileri-de habar berdi.
