RR Auction auksion öýi Stiw Jobsuň awtografly (goly çekilen) wizit kartoçkasyny satuwa çykardy. 9to5Mac neşiriniň maglumatlaryna görä, wizitka üçin teklipler eýýäm 75 müň dollara ýetdi, gutarnykly mukdar geçen ýylky rekorddan hem ýokary bolup biler.
Bellenilişi ýaly, Stiw Jobs kartoçkada öz goluny 1983-nji ýylda, ilkinji Macintosh çykmazdan bir ýyl öň galdyrdy. Onuň adynyň aşagynda “Müdirler geňeşiniň başlygy” wezipesi görkezilen. Kartoçka gara syýa bilen gol çekilipdir.
Auksionda şular ýaly 14 kartoçka hödürlenýär, ýöne olaryň diňe birinde Jobsuň goly bar. RR Auction tehnologiýalar dünýäsinde esasy täzelikçileriň biri bolan Jobsuň “ýadygärlik zatlaryna saýlap-seçip gol çekendigini” belleýär, şol sebäpli awtografly wizitka hem aýratyn gymmatly hasaplanýar.
Auksion 20-nji fewrala çenli dowam eder. Geçen ýyl şeýle kartoçka 181 000 dollardan gowrak baha satylypdy, indi auksion guramaçylary wizit kartoçkasynyň ahyrky bahasynyň bu mukdardan ýokary bolmagyna garaşýar.
