ABŞ-nyň Zikgehanasy Apple kompaniýasynyň esaslandyryjylarynyň biri Stiw Jobsa bagyşlanan, hümmeti 1 dollar bolan ýadygärlik teňňesini resmi taýdan satuwa çykardy. Bu teňňe barada geçen ýyl yglan edilipdi.
Teňňäniň çykarylmagy American Innovation $1 Coin Program maksatnamasynyň çäginde amala aşyryldy. Bu maksatnamanyň maksady görnükli amerikan nowatorlaryny we olaryň ýurduň ösüşine goşan goşantlaryny sarpalamakdan ybarat. Häzirki döwrüň iň beýik wizionerleriniň biri hökmünde ykrar edilen Stiw Jobs ýokary tehnologiýalary hemme adam üçin düşnükli we elýeterli etmäge çalşypdy.
Teňňäniň arka tarapynda ol tebigatda oturan görnüşinde şekillendirilip, bu «çylşyrymly tehnologiýalary edil tebigatyň özi ýaly aňsat we adaty bir zada öwürmegi» alamatlandyrýar.
ABŞ-nyň Zikgehanasynyň direktory Pol Hollis bu teňňe arkaly edaranyň Jobsuň dünýädäki zatlaryň özara gatnaşyklaryny üýtgeden hem-de Kaliforniýanyň we bütin milletiň taryhynda möhüm orun eýelän ägirt uly işini ykrar edýändigini belledi.
Teňňäniň ýüz tarapynda (awers) bolsa «IN GOD WE TRUST» ýazgysy we hümmeti görkezmek bilen Azatlyk heýkeliniň şekili ýerleşdirilen.
Hümmetiň 1 dollar bolmagyna garamazdan, kolleksionerler üçin bölek söwda bahasy 2,5 dollar diýlip kesgitlendi. Önümi 25 sany teňňeden ybarat rulonlarda 61 dollara ýa-da 100 sany teňňeli haltalarda 154 dollara satyn alyp bolýar. Satyn almak üçin çäklendirme hem hereket edýär — bir öý hojalygyna 10 gaplamadan köp berilmeýär.
