2025-nji ýylyň dördünji çärýeginde dünýäde iň köp satylan 10 modeliň arasynda iPhone smartfonlary bäş orny eýeledi. Muňa Counterpoint Research kompaniýasynyň maglumatlary şaýatlyk edýär.
Sanawyň lideri dünýäniň ähli satuwynyň takmynan 5%-ini tutan iPhone 17 Pro Max boldy. Ikinji we üçünji orunlary degişlilikde iPhone 17 we iPhone 17 Pro eýeledi. Şeýle hem sanawa iPhone 16 (dördünji orun) we iPhone 16e (sekizinji orun) girmegi başardy.
Samsung kompaniýasy esasan «Galaxy A» hatarynyň saýasynda ilkinji onlukda dört orny eýeleýär. Sanawa Galaxy A56, Galaxy A36, Galaxy A07 modelleri we flagman Galaxy S25 girdi.
Başga brendiň ýeke-täk wekili bolsa sanawyň dokuzynjy ornunda ýerleşen Xiaomi kompaniýasynyň Redmi A5 modeli boldy.
Umuman alanyňda, iň meşhur on sany model çärýek boýunça dünýä satuwynyň 23%-ini üpjün etdi.
Analitikler Apple kompaniýasynyň durnuklylygyny aýratyn nygtaýarlar: iPhone 16 modeli 2025-nji ýylyň dowamynda onlukdan çykmady. Bilermenler täze iPhone 17 hatarynyň üstünligini satuwlaryň şowly başlamagy we esasy wersiýalaryň tehniki taýdan kämilleşdirilmegi, şol sanda operatiw ýadyň göwrüminiň artdyrylmagy we ekranyň täzeleniş ýygylygynyň ýokarlandyrylmagy bilen baglanyşdyrýarlar.
