Disneyland we Disney California Adventure tematiki seýilgählerinde ýüzi tanamak ulgamynyň ulanylmagy sebäpli Disney kompaniýasynyň üstünden köpçülikleýin şikaýat arzasy berildi. Şikaýatçylar seýilgählere gelýän adamlara biometrik maglumatlaryň ýygnanylýandygy we işlenilýändigi barada degişli derejede duýdurylmaýandygyny öňe sürýär.
Arzada seýilgäh myhmanlarynyň ýüzi skanirlemek tehnologiýasyny ulanmak üçin ýazmaça razylyk bermändikleri aýdylýar.
Gelýänleriň toparynyň bähbitlerini aklawçy Bleýk Ýagman goraýar. Onuň aýtmagyna görä, şeýle maglumatlaryň ýygnanylmagy diňe ulanyjylar tarapyndan anyk tassyklama berlenden soň amala aşyrylmalydyr.
Bu iş boýunça talabyň möçberi azyndan 5 million dollara barabar. Şeýle-de, şikaýat arzasynda Disney-iň maglumatlary saklamak we bozmak boýunça alyp barýan syýasaty şübhe astyna alynýar. Kompaniýa mundan ozal skanerlerden alnan maglumatlaryň 30 günden köp saklanmaýandygyny mälim edipdi.
Arzanyň awtorlary maglumatlaryň has uzak wagtlap saklanmagynyň mümkindigini çaklaýar, sebäbi ýüzüň şekilleri bilet satyn alnanda we ýyllyk abonentler resmileşdirilende ulanylan fotosuratlar bilen deňeşdirilýär.
Disney ýüzi tanamak ulgamyny 2026-njy ýylyň aprel aýynda işe girizipdi. Ol biletleri has çalt barlamak we gelýänleri seýilgählere çalt geçirmek üçin ulanylýar.
