27-nji aprelde Disney+ striming hyzmaty "Enkanto", "Doňan ýürek - 2" we "Moana - 2" multfilmlerinden esasy aýdymlaryň täzelenen wersiýalaryny çykarar. Onda gahrymanlar hit aýdymlary amerikan yşarat dilinde (ASL) ýerine ýetirýär.
Taslama "The Next Right Thing", "We Don't Talk About Bruno" we "Beyond" aýdymlaryny öz içine alýar, olaryň animasiýalary yşarat dilini dogry beýan etmek üçin doly täzeden işlenip düzüldi.
Taslama Disney-iň belli animatory Haýram Osmond ýolbaşçylyk etdi. Deaf West teatrynyň çeper ýolbaşçysy Di Jeý Kurs aýdymlary ASL diline terjime etdi, horeograf Katalin Sakkettiniň hereketleri bolsa animasiýa döretmek üçin esas bolup hyzmat etdi.
Osmondyň sözlerine görä, adaptasiýany döretmek pikiri onuň öz kakasy bilen gepleşmekdäki şahsy tejribesinden döräpdir: animator ker we eşidişi pes tomaşaçylara päsgelçiligi ýok etmäge ýardam bermek isleýär.
Döredijiler yşaratlaryň şahsylaşdyrylyşyna aýratyn üns berdiler. Sakkettiniň düşündirmegine görä, her bir gahrymanyň yşarat stili olaryň şahsyýetini görkezmäge gönükdirilen: käbir gahrymanlaryň yşaratlary dogumly, käbirleriniňki bolsa birneme salykatly, sabyrly. Bu bolsa animasiýanyň mümkin boldugyça realistik bolmagyna hem-de adamlaryň dili dürli tizlikde we dürli emosional öwüşginde ulanýan ASL ýörelgelerine laýyk gelmegine mümkinçilik berdi.
“Disney” öz ýörite taslamalary bilen ugurdaşlykda meşhur franşizalarynyň indiki bölümleriniň üstünde işlemegini hem dowam etdirýär. “Doňan ýürek - 3” we “Doňan ýürek - 4” häzirki wagtda bir wagtyň özünde işlenip düzülýär. Mark Smit bilen bilelikde taslamalaryň üstünde işleýän Jennifer Li işleriň çalt depginde dowam edýändigini habar berdi. Üçünji bölümiň 2027-nji ýylyň 24-nji noýabrynda çykmagy meýilleşdirilýär.
