Meta kompaniýasy emeli aň (EA) ulgamlary üçin serwer infrastrukturasyny güýçlendirmek maksady bilen, düýbi Günorta Koreýada ýerleşýän we EA tizlendirijileri öndürýän FuriosaAI kompaniýasyny satyn almak boýunça gepleşikleri geçirýär. Bu barada «TechCrunch» neşiri habar berýär.
Samsung we AMD-niň öňki işgärleri tarapyndan esaslandyrylan FuriosaAI kompaniýasy EA modelleriniň işini ep-esli çaltlandyrýan çipleri işläp düzýär. Bu modellere Meta-nyň «Llama 2» we «Llama 3» ýaly tekst generasiýa modelleri hem degişlidir.
Maglumatlara görä, FuriosaAI kompaniýasy Günorta Koreýanyň tehnologik kompaniýasy Naver-iň hem gatnaşmagynda maýadarlardan takmynan 90 milliard koreý wony (takmynan, 61,94 million dollar) maýa çekdi. FuriosaAI kompaniýasy ABŞ-daky, Ýaponiýadaky we Hindistandaky potensial müşderiler bilen hyzmatdaşlyk edýändigini ozal hem aýdypdy, emma olaryň atlaryny aç-açan beýan etmändi.
Bilermenleriň pikirine görä, bu ädim Meta-nyň Nvidia kompaniýasyna bolan garaşlylygyny azaltmak, şeýle hem ýokary öndürijilikli EA tizlendirijileri döretmek baradaky tagallalarynyň bir bölegi bolup durýar.
Ýatlatsak, OpenAI kompaniýasynyň hem şu ýyl özüniň ýörite EA çipleriniň önümçiligine başlajakdygyny habar beripdik. Şeýle-de Saud Arabystanynyň hökümeti hem EA çip öndürijisi bolan «Groq» kompaniýasyna 1,5 milliard dollar maýa goýjakdygyny mälim edipdi.
