Apple kompaniýasy Android smartfonlar we planşetler üçin resmi taýdan Apple TV goşundysyny çykardy. Bu barada kompaniýanyň resmi web sahypasynda habar berilýär.
Indi bu operasion ulgamyň (Samsung, Xiaomi we ş.m. enjamlaryň) ulanyjylary hem Apple TV+ tomaşa edip, MLS Season Pass-a agza bolup, abunalyklaryna gönüden-göni Google Play-den gözegçilik edip bilerler. Goşundy eýýämden Google Play-de elýeterli bolup, Android 10 we ondan ýokary wersiýalarda işleýän enjamlar üçin goldaw berýär.
Uzak wagt garaşylan goşundy Apple enjamlarynyň ulanyjylaryna tanyş bolan esasy Apple TV funksiýalaryny goldaýar. Olaryň arasynda «Görmäge dowam et» (Продолжить просмотр) sanawy, internet ýok wagty (offline) görmek üçin ýükläp almak we gözleg funksiýalary bar. Tomaşa edilýän mazmunyň dowamlylygy ulanyjynyň ähli enjamlarynyň arasynda sinhronizasiýa edilýär, ýagny sazlaşykly saklanýar – meselem, görmäge telewizorda başlap, soň yzyny smartfonda dowam edip bolýar. Umuman, interfeýs sada (minimalistik) stilde işlenip taýýarlanan, planşetlerde bolsa şol funksiýalar gapdallaýyn panele uýgunlaşdyrylan.
Goşundynyň içindäki mazmunlaryň diňe Apple TV+, MLS Season Pass we MLB Friday Night Baseball bilen çäklidigini bellemek möhümdir. Android-de iTunes Store-dan satyn alnan mazmunlar görkezilmeýär, şeýle-de ulanyjylar ozal satyn alan kitaphanalaryna girip bilmeýärler. Bildirişler we Google Cast arkaly wideolary beýleki enjamlarda görkezmek ýaly mümkinçilikler hem goldanmaýar. Şeýle-de bolsa bu goşundy Android enjamlar üçin ilkinji doly Apple TV programmasydyr. Häzirki wagta çenli ulanyjylar onuň web wersiýasyny ulanmaga mejbur bolýardylar.
Şol bir wagtda Google TV üçin Apple TV goşundysy hem täzelendi. Indi ulanyjylar Apple TV+ we MLS Season Pass-a Google Play Billing arkaly agza bolup bilerler.
Kompaniýa Apple TV+ bilen heniz tanyş bolmadyklar üçin, Android goşundysy arkaly ýedi günlük mugt synag wersiýasyny hödürleýär.
