Hytaýly alymlaryň topary hakyky ösümligiň wezipelerini ýerine ýetirip bilýän emeli ýapragy döretdi. Ol Gün şöhlesini elektrik toguna öwürýär diýip, Interesting Engineering habar berýär.
Ýapraklar tebigy elektrik stansiýasy mysaly, sebäbi olar Gün şöhlesini, CO2-ni we suwy ulanyp, fotosintez arkaly energiýa öndürýär. Soňra olar bu energiýany kislorod öndürmek üçin ulanýarlar.
Hytaýly barlagçylaryň döreden innowasiýa işläp taýýarlamalary fotosinteziň şol bir tebigy proseslerine öýkünýär. Emeli ýaprak plastmassadan ýasalyp, çeýe Gün energiýasy bilen işleýän elektrodlar bilen enjamlaşdyryldy we Günüň hereketine gözegçilik etmäge mümkinçilik berýän suw geçiriji gel bilen örtüldi. Ýapragyň içinde Gün şöhlesi düşende gyzýan uglerod nanoturbajyklary bar. Gyzmagyň netijesinde ýaprakdaky polimer gysylýar-da, ýapragy egýär we ony Güne tarap öwürýär.
Emeli ýaprak suwy wodoroda we kisloroda bölüp biler, bu bolsa ýangyç öndürmek üçin mümkinçilikler açýar. Mundan başga-da, ol ýokary durnuklylygy görkezýär, 65 sagat işlänsoňam, netijeliliginiň 73% -ini saklaýar.
Üýtgeşik aýratynlyklarynyň bardygy sebäpli suwuň aşagynda-da işläp bilýär, adaty Gün elementleri bilen muny etmek mümkin däl.
Entek bularyň ählisi diňe barlag taslamasy we ylym üçekdäki Gün panelleri bilen bäsleşip biljek emeli agaçlary döretmekden heniz uzakda. Mysal üçin, nanoturbajyklaryň ömrüniň gysgalygy meselesini çözmeli. Wagtyň geçmegi bilen olar netijeliligini ýitirýärler we şondan soň ýapragyň Güne bakyşy dogry işlemeýär. Hakyky dünýäde howa şertleri hem mesele döredip biler, ýel bilen suw öndürijiligi çynlakaý çäklendirip biler.
Şeýle-de bolsa, alymlar geljekde adaty tebigy proseslere esaslanýan tehnologiýalaryň Gün energiýasyny öndürmekde has netijeli çözgütler üçin esas bolup biljekdigine şübhelenmeýärler.
