Halkara alymlar topary Latyn Amerikasynyň ýurtlarynda ýaşaýan 1 ýaşdan 4 ýaş aralygyndaky 1878 çaganyň gatnaşmagynda barlag geçirdi. Olar körpeleriň aglabasynyň ekranyň öňünde maslahat berilýän wagtdan has köp oturýandygyny görkezdi. Iň meşhur enjamlar telewizor we smartfon bolup çykdy.
Barlaga gatnaşyjylar bilen geçirilen pikir soraşmada olaryň sosial-ykdysady ýagdaýy maşgalanyň esasy çeşmelere elýeterliligine, ene-atalaryň bilim derejesine we hünärlerine baglylykda kesgitlenildi.
Hünärmenler öz gözegçilikleriniň netijelerini MedicalXpress-da çykan makalasynda paýlaşdylar.
Alymlar köp wagtyny ekranyň öňünde geçirýän çaganyň sözleýiş diliniň ýaramaz ösýändigini anykladylar. Şol bir wagtyň özünde, kitap okamak we ene-atalar bilen bilelikde telewizora ýa smartfona tomaşa etmek, tersine, sözleýiş endikleriniň ösmegine itergi berýär. Şonda, esasan, bilim beriji programmalary saýlamak maslahat berilýär.
Telewizora köp seredýän çagalaryň söz gory çäkli bolýar we giç gepläp başlaýarlar. Bu, esasanam, okamaklyga az üns berilýän, sosial-ykdysady ýagdaýy pes maşgalalardaky çagalara mahsusdyr. COVID-19 pandemiýasyndan soň ýagdaý has-da erbetleşdi.
Çaga lukmanlary iki ýaşa çenli çagalara gajet bermezligi maslahat berýär, uly ýaşly çagalar bolsa olary gaty az we ulularyň gözegçiligi astynda ulanmalydyrlar.
