Hytaýyň BYD awtoulag ägirdi elektrikli awtoulaglarynyň iň arzan bahaly modellerini hem sürüjilere kömek ulgamynyň döwrebap görnüşi bilen enjamlaşdyrmagy meýilleşdirýär. Kompaniýa munuň hemmeler üçin “akylly” sürüşiň täze eýýamynyň başy boljakdygyna ynanýar.
Hatda 10 müň dollardan arzan bahaly awtoulaglarda hem awtopilot bolar.
South China Morning Post-yň maglumatlaryna görä, kompaniýa azyndan 21 sany elektrikli ulagy we gibrid modelinde SAE Level 2 sürüjä kömek ulgamyny gurmagy meýilleşdirýär.
BYD-yň baş direktory Wan Çuanfu God’s Eye diýlip atlandyrylýan awtopilot ulgamynyň soňky 7 ýylyň dowamynda 5000 inženerden ybarat toparyň tejribesini ulanmagyň hasabyna, garaşylyşyndan has ýokary netijäni berjekdigini aýtdy.
Seljerijiler Hytaý bazarynda satylýan täze awtoulaglaryň üçden iki böleginiň awtopilotyň ol ýa-da beýleki görnüşi bilen üpjün ediljekdigini çaklaýarlar. Şu ýyl Hytaýyň bazaryna çykjak azyndan 15 million täze awtoulag iň bolmanda 2-nji derejeli özbaşdaklyga eýe bolar. Ol sürüji tarapyndan ulagyň ýagdaýyna yzygiderli gözegçilik edilmegini we elleri rulda saklamagy öz içine alýar, ýöne tehniki taýdan köp görnüşli hereketleri awtomatlaşdyrmaga mümkinçilik berýär. Sürüji dolandyryş işine islendik wagt goşulmaga taýyn bolmaly.
Awtoulag öndürijileri, esasanam, elektrik ulagy segmentinde görnetin ýokary bäsdeşlik şertlerinde işleýärler. Şonuň üçin BYD XPeng, Huawei we Nio ýaly oýunçylara ornuny bermezlik üçin käbir çynlakaý işleri geçirmeli bolar.
Soňky ýyllarda 2-nji derejeli sürüjilere işjeň kömek ulgamynyň bahasy her awtoulag üçin 1400 dollara çenli arzanlady, ýagny üç ýylda iki esse aşak düşdi. Tesla häzirki wagtda Hytaýda FSD ulgamyny diňe synagdan geçirýär we onuň köpçülikleýin öndürilýän elektrik ulaglarynyň eýeleri tarapyndan ulanylmagyna rugsat almady. Şol bir wagtyň özünde ABŞ-da FSD-ni işjeňleşdirmek 8000 dollar durýar, BYD bolsa 2-nji derejeli awtopilotyny müşderilere goşmaça tölegsiz berýär.
