Honda kompaniýasy Japan Mobility Show sergisinde adynda «alfa» nyşany bolan Honda 0 krossoweriniň prototipini ilkinji gezek görkezdi. Bu model täze elektrikleşdirilen “0” maşgalasynyň üçünji modeli bolup, ondan öň 0 Saloon atly sedan we has uly göwrümli 0 SUV krossoweri tanyşdyrylypdy.
Täze krossoweriň önümçilik wersiýasynyň 2027-nji ýylda satuwa çykmagyna garaşylýar. Ilkinji satuw bazarlary hökmünde Ýaponiýa we Hindistan göz öňünde tutulýar.
“0” seriýasyndaky awtoulaglar häzirki Honda modellerinden düýpgöter tapawutlanýan konstruktiw dizaýn ýörelgesine eýerýär. “Alfa” prototipinde uly krossoweriň umumy keşbi saklanyp galýar, ýöne teker bazasy gysgaldy, öň optika täze görnüşde işlenildi, gapy tutawaçlary täzelendi, şeýle-de yzky gapylaryň aňyrsyndaky ownuk penjireler aýryldy.
Täze modeliň tehniki aýratynlyklary entek resmi taýdan aýdylmady. Emma sedan hem-de iki krossoweriň Sony bilen bilelikde Afeela elektrik ulagy üçin işlenip düzülen umumy platformada gurulmagyna garaşylýar. Deslapky maglumata görä, ulagyň bir doly zarýad bilen azyndan 500 km ýol geçip biljekdigi çak edilýär.
