Fransiýanyň Prezidenti Emmanuel Makron emeli aňy (EA) ösdürmek üçin 109 milliard ýewro möçberdäki uly maýa goýumlarynyň goýuljakdygyny mälim etdi. Bu karar Amerikanyň 500 milliard dollarlyk «Stargate» taslamasyna garşy Fransiýanyň beren jogaby bolup durýar diýip, TechCrunch habar berýär.
Bu barada Parižde 2024-nji ýylyň 10-11-nji fewralynda EA boýunça geçirilen üçünji halkara sammitiň (AI Action Summit) çäginde aýdyldy.
TechCrunch neşiriniň habaryna görä, bu serişdeleriň esasy bölegi EA üçin ýörite niýetlenen täze maglumat merkezleriniň (data-center) gurluşygyna gönükdiriler.
Makron şeýle-de EA pudagy boýunça fransuz startaplary – «Mistral», «Owkin» we «Wandercraft» barada aýratyn belläp geçdi.
«Hemmeler has uly we has güýçli bolmaly diýip pikir edýärdi. Emma DeepSeek OpenAI-yň iň soňky modelinde bar bolan innowasiýalary alyp, olary özüne uýgunlaşdyrmak arkaly has tygşytly çemeleşmeleriň mümkindigini subut etdi» diýip, Makron belledi.
Ýatlatsak, Mistral – EA boýunça öňdebaryjy modelleri işläp düzýän «Alibaba», «Anthropic», «DeepSeek», «Meta» hem-de «OpenAI» ýaly tehnologiýa ägirtleri bilen bäsleşýän seýrek ýewropaly kompaniýalaryň biridir.
Fransiýanyň öndürýän elektrik energiýasynyň mukdary ýurduň sarp edýän mukdaryndan köpdür. Şeýle-de elektrik energiýasynyň köp mukdary atom elektrik stansiýalarynda öndürilýär. Şol sebäpden Fransiýa köp energiýa talap edýän maglumat merkezleri üçin örän amatly mekan bolup durýar.
Şeýle-de Makron, durnukly we ekologiýa taýdan arassa energiýa ulgamynyň Fransiýany EA pudagyndaky iri taslamalary durmuşa geçirmek üçin ideal ýurda öwürýändigini belläp geçdi.
