Tesla, SpaceX we beýleki birnäçe kompaniýalaryň ýolbaşçysy Ilon Mask gysga wideolar platformasy bolan TikTok-y satyn almakçy bolýandygy baradaky maglumaty ret etdi.
Milliarder bu barada ýanwar aýynyň ahyrynda Axel Springer SE mediakompaniýasynyň The WELT Group torunyň sammitine gatnaşyjylara öz wideo ýüzlenmesinde aýtdy, ýöne onuň teswirleri diňe häzir köpçülige belli boldy diýip, Bloomberg habar berýär.
“Men TikTok-a bil baglamadym. Meniň, eger mende TikTok bolan bolsa, näme etjekdigim bilen bagly hiç hili meýilnamam ýok” – diýip, Mask aýtdy. Ol gysga wideo üçin programmadan peýdalanmaýandygyny we onuň formaty bilen tanyş däldigini sözüniň üstüne goşdy.
“Men TikTok-y satyn almagyň küýüne düşemok, men, aslynda, kompaniýa satyn almaýaryn, bu örän seýrek ýagdaý” – diýip, Mask aýtdy. Ol 44 mlrd dollara häzir X diýlip atlandyrylýan Twitter media platformasyny satyn almagyny bolsa, adatdan daşary ýagdaý diýip belledi. “Adatça, men kompaniýany noldan döredýärin” – diýip, ol sözüniň üstüni ýetirdi.
Degişli habar ABŞ-nyň Prezidenti Donald Tramp, eger Mask wideoserwisi satyn almak islese, onuň teklibine seretmäge taýýardygyny aýdandan bir hepde soň ýaýrady. Häzirki wagtda bu programma ABŞ-da ýapylmak howpy abanýar, sebäbi ol milli howpsuzlyga zyýan ýetirýär diýlip hasaplanýar. TikTok 19-njy ýanwarda bloklanypdy, ýöne birnäçe sagatdan, Tramp platforma puryja bermäge taýýardygyny aýdandan soň, işini gaýtadan dikeltdi. Ol prezident wezipesine girişenden soň, degişli permana gol çekdi.
Muňa garamazdan, Apple we Google öz programma dükanlarynda TikTok-y henizem dikeltmedi. Şonuň üçin ABŞ-da Android ulanyjylary programmany platformanyň web-saýtyndaky bukjalar arkaly ýükläp alýar.
