10-njy fewralda 2024-nji ýylyň görkezijileri boýunça ýurdumyzda iň gowy etrap diýlip yglan edilen Sakarçäge etrabyna ABŞ-nyň 1 million dollary möçberindäki pul baýragyny gowşurmak dabarasy boldy.
Dabara Sakarçäge etrabynyň Döwletli zaman şäherçesiniň Medeniýet öýüniň binasynda geçirildi.
Mälim bolşy ýaly, bu bäsleşik ýurdumyzy durmuş-ykdysady taýdan ösdürmek, sebitlerde ilatyň ýaşaýyş-durmuş şertlerini yzygiderli gowulandyrmak boýunça maksatnamalary amala aşyrmak babatda alnyp barylýan işleri höweslendirmek maksady bilen her ýyl geçirilýär.
Dabara Mejlisiň deputatlary, welaýat hem-de etrap halk maslahatlarynyň agzalary, Kärdeşler arkalaşyklarynyň Milli merkeziniň, Zenanlar birleşiginiň Merkezi geňeşiniň, welaýat, etrap häkimlikleriniň ýolbaşçylary, telekeçiler, jemgyýetçilik guramalarynyň, medeniýet ulgamynyň, köpçülikleýin habar beriş serişdeleriniň wekilleri, il sylagly ýaşulular gatnaşdylar.
Belläp geçsek, Döwletli zaman şäherçesi türkmen halkynyň Milli Lideriniň gatnaşmagynda açyldy. 2022-nji ýylda etrabyň çäginde köp gatly ýaşaýyş jaýynyň dabaraly açylyp ulanmaga beridli. Durmuş goraglylygyna aýratyn mätäçlik çekýän raýatlara sowgat berildi. 2024-nji ýylda bolsa etrabyň Şatlyk şäherçesinde täze metjit açyldy.
Dabaraly maslahat welaýatyň estrada aýdymçylarynyň ýerine ýetiren joşgunly aýdym-sazlary bilen utgaşdy.
