10-njy fewralda Prezident Serdar Berdimuhamedowyň tabşyrygy boýunça Mejlisiň Başlygy D.Gulmanowa Gwatemala Respublikasynyň ýurdumyzda täze bellenen Adatdan daşary we Doly ygtyýarly ilçisi Eduardo Enrike Ernandes Resinosdan ynanç hatyny kabul etdi.
Eduardo Enrike Ernandes Resinos diplomatik işini Ankara şäherinde oturan ýerinden alyp barar.
Söhbetdeşligiň barşynda Gwatemala Respublikasynyň doly ygtyýarly wekili Türkmenistanyň içeri we daşary syýasatynyň esasy ugurlary, ýurdumyzda durmuşa geçirilýän giň gerimli özgertmeler bilen tanyşdyryldy. Şeýle hem ilçä milli parlamentiň düzümi, onuň ýurdumyzda amala aşyrylýan özgertmeleriň çäklerinde alyp barýan işleri barada gürrüň berildi.
Duşuşygyň ahyrynda Eduardo Enrike Ernandes Resinos Türkmenistanda Gwatemala Respublikasyna wekilçilik etmegiň özi üçin uly hormatdygyny aýdyp, iki ýurduň arasyndaky gatnaşyklary ösdürmek üçin tagallalaryny gaýgyrmajakdygyna ynandyrdy.
Şol gün Eduardo Enrike Ernandes Resinos şeýle hem Türkmenistanyň DIM-nde daşary işler ministriniň orunbasary Ahmet Gurbanow bilenduşuşyp, ynanç hatlarynyň nusgalaryny gowşurdy.
Duşuşygyň barşynda diplomat Türkmenistanyň parahatçylyk söýüjilikli daşary syýasatynyň ileri tutulýan ugurlary bilen tanyşdyryldy.
