Apple kompaniýasynyň robototehnika bölümi «Lýukso-körpe» (Люксо-младший) multfilmindäki çyrany ýada salýan robotyň nusgalyk modelini görkezdi. Bu barada «Apple Machine Learning Research» web sahypasynda habar berilýär.
Işläp düzüjiler robotyň iki görnüşini görkezdiler: «Expressive» we «Functional».
Iki robot hem stoluň üstüne ýerleşdirilen çyrany ýada salýar. Olar eliň hereketlerine we sesli buýruklara jogap berip bilýär. Sesleri bolsa iPhone-lardaky Siri atly kömekçiniň sesine meňzeýär.
«Expressive» atly robot-çyra adamlar bilen has gowy täsirleşýär. Mysal üçin, ondan howanyň ýagdaýy soralanda, robot ilki penjirä seredýär, soň bolsa howa maglumatyny paýlaşýar. Wagtly-wagtynda suw içmelidigini ýatlatmak üçin bulgury itekleýär. Eýesi gezmäge çykjakdygyny, emma ony alyp gidip bilmejekdigini aýdanda, ol «başyny» aşak egip gynanýar. Şeýle-de paýlaşylan wideoda aýdym goýberilende robotyň tans edip, söhbetdeşiniň ruhuny göterýän pursatlaryny hem görmek bolýar.
«Functional» atly robot-çyra bolsa diňe buýruklary ýerine ýetirýär, buýruk berilmedik ýagdaýynda bolsa hereketsiz durýar.
Geçen ýyl Bloomberg-iň žurnalisti Mark Gurman Apple-yň şular ýaly robotyň üstünde işleýändigini habar beripdi. Gurmanyň sözlerine görä, Apple täze enjamyny 2026-njy ýa-da 2027-nji ýylda köpçülige hödürlär.
