Apple kompaniýasy howpsuzlyk täzelenmeleriniň täze formatyny — «Background Security Improvement» hödürledi, şeýle-de birnäçe köne enjamlary resmi taýdan könelen diýip yglan etdi.
Täze mehanizm iOS, iPadOS we macOS ulgamlarynyň esasy täzelenmeleriniň arasynda kiçiräk düzedişleri gurnamaga mümkinçilik berýär. Indi olar fon tertipde ýüklenýär we enjamyň gysga wagtlyk täzeden ýüklenmegini — bir minutdan hem az wagty talap edýär.
Bu täzelenmeler Safari, WebKit we ulgam kitaphanalary ýaly esasy komponentlere gönükdirilendir. Ilkinji täzelenme eýýäm çykaryldy we ol WebKit üçin düzedişleri öz içine alýar. Bu funksiýa ulgamyň 26.1 wersiýasyndaky enjamlarda elýeterlidir we ol başlangyç sazlamalarda işjeňleşdirilen ýagdaýdadyr.
Gurnalan fon täzelenmeleri baradaky maglumaty enjamyň sazlamalaryndaky «Konfidensiallyk we howpsuzlyk» bölüminden barlap bilersiňiz.
Mundan başga-da, Apple iPhone 5 we iPhone 4 (8 GB) modellerini könelen enjamlaryň sanawyna geçirdi. Bu bolsa satuwlaryň bes edilen gününden bäri ýedi ýyldan gowrak wagtyň geçendigini aňladýar. Indi bu enjamlar kompaniýanyň resmi serwis merkezlerinde bejeriş üçin kabul edilmez.
