4-nji martda Apple kompaniýasy özüniň iň elýeterli noutbugy bolan MacBook Neo-ny tanyşdyrdy. Modeliň bahasy 599 dollardan başlanýar. Bilim ulgamyndaky alyjylar üçin bolsa arzanladyşly baha — 499 dollar bellenildi.
Deňeşdirmek üçin aýtsak, MacBook Air-iň bahasy 1099 dollardan, MacBook Pro-nyňky bolsa 1699 dollardan başlanýar.
MacBook Neo-nyň 599 dollarlyk binýatlaýyn wersiýasy 256 gigabaýt ýat bilen enjamlaşdyrylan. Ol Touch ID funksiýasyny goldamaýar. Bu funksiýa 512 gigabaýt ýat bilen birlikde bahasy 699 dollar bolan modelde bar.
Noutbuk dört reňkde: kümüşsöw, gülgüne, sitrus we indigo reňklerinde elýeterli bolar.
Apple eýýäm täze model üçin öňünden sargytlary kabul edip başlady. MacBook Neo-nyň resmi satuwlary 11-nji martda başlanar.
Şu aýyň başynda kompaniýa bahasy 599 dollardan başlanýan iPhone 17e býujet smartfonyny hem tanyşdyrypdy. Gara, ak we gülgüne reňklerde hödürlenýän bu modeliň satuwlarynyň başlanjak güni hem 11-nji marta bellenipdi.
