8-nji fewralda türkmen halkynyň Milli Lideri Gurbanguly Berdimuhamedow Arkadag şäheriniň Garagum derýasynyň demirgazygynda ýerleşýän lagym suwlaryny gaýtadan işleýän desga bardy. Bu barada TDH habar berýär.
Garagum derýasynyň demirgazygynda Arkadag şäheriniň birinji tapgyrynyň lagym suwlaryny gaýtadan işleýän desga hereket edýär. Bu ýerde Türkmenistanyň Halk Maslahatynyň Başlygy nobatdaky guruljak lagym suwuny gaýtadan işleýän toplumyň enjamlaşdyrylyşy, onuň işleýiş aýratynlyklary bilen tanyşdy.
Toplumyň çäginde suw durlaýjy howdan, ýapyk drenaž ulgamy, suwaryş suw toplumy, ozon generatorlary, 100 müň kub metr suw saklamaga niýetlenen desga bar.
Onda lagym suwlaryny gaýtadan işlemek, gaýtadan işlenen we häzirki zaman talaplaryna laýyk gelýän suwlary Arkadag şäheriniň gök zolaklaryny, seýilgählerini, şäher baglaryny suwarmak, şäheriň önümçilik toplumlarynyň, şäheriň golaýyndaky obalaryň zerurlyklary üçin ulanmak meýilleşdirilýär. Gaýtadan işlenen suwuň artykmaç möçberleri bolsa Garagum derýasyna akdyrylar.
