Ýakynda arzanlygy we ýokary öndürijiligi bilen özüni tanadan Hytaýyň DeepSeek çat-boty howpsuzlyk babatda örän gowşak bolup çykdy. Cisco kompaniýasynyň gözlegçileri modeli testden geçirip, onuň goragy ýeňip geçmek synanyşyklaryna garşy durmaga ukyply däldigini anyklady.
Synagdan geçiriji topar HarmBench maglumatlar toplumyndan 50 sany tötänleýin buýrugyň esasynda jeýlbreýkiň (döwmek) kömegi bilen DeepSeek R1-i synap gördi. Buýruklar kiberjenaýatçylyk, ýalan maglumat, bikanun iş we umumy zyýan ýaly zyýanly hereketleriň alty kategoriýasyny öz içine aldy.
“Netijeler howsala döretdi: DeepSeek R1 hüjümleriň 100% üstünligini görkezdi, ýagny ol ýekeje-de zyýanly buýrugy petikläp bilmedi” – diýip, Cisco belledi. Beýleki öňdebaryjy modeller, mysal üçin, OpenAI-den o1 hüjümleriň köpüsini blokirledi.
Ylmy gözlegçiler meseleleriň sebäbini maliýeleşdirmegiň ýeterlik däldigi bilen baglanyşdyrýar. DeepSeek çat-botyny döretmek üçin bary-ýogy 6 mln dollar sarp edildi, emma OpenAI-iň GPT-5 EA modeli üçin hasaplaýyş çykdajylary 500 mln dollara ýetip bilýär.
Goragyň gowşakdygyna garamazdan, çat-bot Hytaý bilen baglanyşykly käbir syýasy temalarda çäklendirmeleri ýerine ýetirýär. Ýöne bu onuň giňden ýaýramagyna päsgel bermeýär: Similarweb-iň maglumatlaryna görä, sanlyja günde web-wersiýa girýän ulanyjylaryň sany günde 300 müňden 6 milliona ýetdi.
