2025-nji ýylda Türkmenistanda umumy meýdany 500 müň inedördül metre golaý ýaşaýyş jaýlaryny, 4620 orunlyk umumybilim edaralaryny, 2000 orunlyk mekdebe çenli çagalar edaralaryny gurup, ulanmaga bermek meýilleşdirilýär. Bu barada Prezident Serdar Berdimuhamedow 7-nji fewralda giňişleýin Hökümet mejlisinde çykyşynda aýtdy.
Döwlet Baştutanynyň belleýşi ýaly, 2025-nji ýylda:
- Ahal welaýatynyň Ak bugdaý etrabynyň Öňaldy, Kaka etrabynyň Gowşut geňeşliklerinde, şeýle hem Balkan welaýatynyň Gyzylarbat etrabynda täze döwrebap obalar,
- Daşoguz welaýatynyň Köneürgenç etrabynda täze, döwrebap şäherçe,
- Balkan welaýatynda Garabogazköl aýlagynyň üstünden geçýän awtomobil köprüsi;
- Balkan welaýatynyň Jebel şäherçesinde Halkara howa menzili toplumy;
- «Aşgabat–Türkmenabat» ýokary tizlikli awtomobil ýolunyň Mary-Türkmenabat bölegi;
- Türkmenistanyň Senagatçylar we telekeçiler birleşmesiniň ýokary okuw mekdebi ulanmaga berler.
Prezident Serdar Berdimuhamedow şeýle hem ilatyň ýaşaýyş-durmuş şertlerini gowulandyrmak maksady bilen, awtomobil ýollarynyň, aragatnaşyk, suw, gaz we elektrik üpjünçilik ulgamlarynyň, suw we lagym arassalaýjy desgalaryň gurluşygyna ep-esli serişde goýberiljekdigini aýtdy.
