OpenAI kompaniýasy ChatGPT emeli aň boty üçin täze funksiýasyny hödürledi. Bu funksiýa ulanyjynyň beren soragyna esaslanyp, «çuňňur gözleg» geçirmäge mümkinçilik berýän «Deep research» (Çuňňur gözleg) atly guraldyr. Täze funksiýa entek köpçülige hödürlenmedik uly dil modeli bolan «OpenAI o3» esasynda işleýär diýip, The Verge neşiri habar berýär.
Täze funksiýanyň düşündirişinde onuň awtonom ýagdaýda işleýändigi, «zerur maglumatlary tapmak üçin köp ädimli gözleg ugruny meýilleşdirýändigi we ýerine ýetirýändigi, zerur ýagdaýlarda yzyna gaýdyp, onlaýn görnüşde ýüze çykýan täze maglumatlara reaksiýa bildirýändigi» aýdylýar. Has takyk aýdylanda, «Deep research» funksiýasy diňe bir ulanyjynyň soragyna jogap tapmak bilen çäklenmän, dürli çeşmelerden maglumatlary seljerýär we umumylaşdyrýar. Netijede, berlen tema boýunça jikme-jik hasabat taýýarlaýar.
«Deep research» işläp durka, ekranyň sag tarapynda gözlegiň gysgaça beýany, şeýle hem sitatalar we beýleki maglumat çeşmeleri görkezilýär. Ulanyjylar täze funksiýany tekst görnüşinde sorag bermek arkaly işledip bilerler, şeýle hem surat ýa-da goşmaça faýllary (meselem, PDF formatyndaky resminamalary ýa-da elektron tablisalary) ýüklemek arkaly giňişleýin maglumat berip bilerler. Munuň netijesinde algoritm has giň kontekste eýe bolar we ýerine ýetirilen işiň netijeleri boýunça jikme-jik hasabat taýýarlamak üçin 5-30 minut aralygynda wagt sarp eder. Geljekde bolsa çat-bot öz jogaplaryna suratlary we diagrammalary hem goşup başlar.
OpenAI, «Deep research» funksiýasynyň käwagt «aňynyň çaşyp», hakykatda ýok maglumatlary döredip biljekdigini belleýär. Mundan başga-da algoritm, abraýly çeşmeleriň maglumatlaryny ýalan maglumatlardan we myş-myşlardan tapawutlandyrmakda kynçylyk çekýär. Şeýle-de bolsa, OpenAI täze guralyň uly mümkinçiliklere eýedigine ynanýar we «Deep research» funksiýasynyň analitikleriň derejesinde işleýändigini belleýär.
Täze funksiýanyň elýeterliligi barada aýdyp geçsek, abunalyga her aý 200 dollar töleýän ulanyjylar «Deep research» guralyna aýda 100 gezek sorag bermek mümkinçiligine eýe bolarlar. Aýda 20 dollar töleýän ulanyjylara bolsa «çäkli elýeterlilik» kepillendirilýär.
