Moskwada Türkmenistanyň Russiýadaky ilçisi Esen Aýdogdyýewiň «Dutaryň owazlary» Moskwa halkara sungat festiwalynyň guramaçylyk komitetiniň wekilleri bilen iş duşuşygy geçirildi.
Duşuşykda türkmen ýerine ýetirijileriniň we talyplarynyň gatnaşmagynda bilelikdäki çäreleri guramak mümkinçilikleri hem-de medeni hyzmatdaşlygyň ileri tutulýan ugurlary ara alnyp maslahatlaşyldy.
Hususan-da, 2025-nji ýylda geçiriljek IX festiwala taýýarlyk işleri bilen baglanyşykly meseleler gözden geçirildi. Bu çäre Beýik Watançylyk urşunda gazanylan Ýeňşiň 80 ýyllygyna hem-de BMG tarapyndan yglan edilen Halkara parahatçylyk we ynanyşmak ýylyna bagyşlanar.
Çärelere türkmen ýerine ýetirijileriniň we Russiýada bilim alýan talyplaryň gatnaşmagy aýratyn üns merkezinde boldy. Festiwalyň çäklerinde konsertleriň, sergileriň, «Uruş çeperçilik aýnasynyň içinde» atly ylmy maslahatyň, şeýle-de okyjylaryň we kompozitorlaryň arasynda bäsleşikleriň geçirilmegi meýilleşdirilýär. Bäsleşikleriň jemleri boýunça «Aýdym-sazly illýustratiw ýygyndy» neşir ediler.
Festiwalyň sungat ýolbaşçysy Mämmet Guseýnow emin agzalarynyň hatarynda ady belli rus we türkmen aýdym-saz ussatlarynyň bardygyny belledi. Olaryň gatnaşmagynda festiwal ýurtlaryň arasyndaky medeni gatnaşyklaryň pugtalandyrylmagyna we dürli halklaryň ýerine ýetirijilerini birleşdirmäge mümkinçilik döredýär.
Guramaçylyk komiteti we ilçihana festiwala ýokary derejede taýýarlyk görmek üçin mundan beýläk-de hyzmatdaşlyk etmegi ylalaşdylar. Duşuşyga gatnaşyjylar bu çäräniň medeni dialog üçin möhüm meýdança öwrüljekdigine ynam bildirdiler.
