Türkmenistanyň daşky gurşawy goramak ministrliginiň wekilleri GOSAT hemrasy arkaly bug gazlarynyň zyňyndylarynyň monitoringi boýunça geçirilýän halkara maslahata gatnaşýarlar. Forum 3–4-nji fewral aralygynda Tokioda geçirilýär. Oňa Merkezi Aziýa ýurtlarynyň, Ýaponiýanyň, Azerbaýjanyň we Mongoliýanyň wekilleri gatnaşýar diýip, ORIENT habar berýär.
Çäräniň çäginde hemra maglumatlaryny ulanyp, zyňyndylaryň sanawyny düzmek mümkinçilikleri ara alnyp maslahatlaşylýar.
Maslahatda Türkmenistanyň daşky gurşawy goramak ministrliginiň Halkara ekologik hyzmatdaşlygyny we taslamalary utgaşdyrmak müdirliginiň başlygynyň orunbasary Mergen Ýusupow çykyş etdi.
Ol döwlet ekologiýa syýasaty, howanyň üýtgemegine garşy göreş boýunça görülýän çäreler we Türkmenistanyň halkara başlangyçlary, şeýle hem Howanyň üýtgemegi boýunça milli strategiýa laýyklykda durmuşa geçirilýän çäreler barada gürrüň berdi.
Konferensiýa gatnaşyjylar tejribe alyşdylar we ikitaraplaýyn hyzmatdaşlygyň geljegi barada pikir alyşdylar. Esasy üns zyňyndylary hasaba alyş usullaryna we bu ugurda sanly tehnologiýalaryň ulanylyşyna berildi.
