Şweýsariýanyň Bazel-Ştadt kantonynyň Salgyt bölümi onlaýn salgyt tölemek üçin niýetlenen web sahypasynyň salgysyny tanadyş mahabatlaryny ýalňyş çap edip, olary 100 müňden gowrak hojalyga iberdi. Edara bu ýalňyşlygy çözmek üçin Bagama adalarynyň domenini satyn almaly boldy diýip, SRF neşirine salgylanyp, TechCrunch habar berýär.
SRF neşiriniň habaryna görä, Bazel-Ştadt kantonynyň Salgyt bölümi adamlara onlaýn görnüşde salgytlary nädip tölemelidigini öwredýän on müňlerçe bildirişe web salgysyny ýalňyş çap etdi. Olar Şweýsariýanyň resmi internet domeniniň ahyryndaky «.ch» bölegini ýazmandyrlar. Netijede, web salgysynyň ahyry diňe «.bs» bolup galypdyr. Emma hakykatda «.bs» Bagama adalarynyň resmi internet domenidir.
Bazel-Ştadt kantonynyň Salgyt bölüminiň metbugat wekili SRF bilen söhbetdeşlikde, täze bildiriş kagyzlarynyň çap edilmegi we ýene-de 100 müň hojalyga iberilmegi üçin takmynan 100 müň dollaryň gerek boljakdygyny aýtdy. Şonuň üçin, 1 müň dollar töläp, täze domeni satyn almak we ony dogry sahypa ugrukdyrmak has amatly çözgüt boldy.
Täze URL häzirki wagtda asyl sahypa ugrukdyrmaýar, sebäbi hasaba alyş prosesleriniň tamamlanmagy üçin belli bir wagt gerek.
