Microsoft kompaniýasy Windows 11-de täze bir funksiýany synaga goýberdi. Bu funksiýa iPhone ulanyjylaryna «Başlat» (Пуск, Start) menýusynyň gyradaky paneli arkaly telefonlaryny dolandyrmaga mümkinçilik berýär diýip, The Verge ýazýar.
Mundan öň, 2024-nji ýylyň güýzünde şunuň ýaly funksiýalar diňe Android enjamlary üçin elýeterli bolupdy.
Windows Insider synag maksatnamasynyň (Dev we Beta) agzalary bu täze aýratynlygy ilkinji bolup synap görüp bilerler.
Täze funksiýa ulanyjylara bildirişleri, habarlary, jaňlary, suratlary hem-de telefonyň zarýad derejesini görmäge mümkinçilik berýär.
«Bir bitewi integrasiýa iPhone eýelerine hem Android ulanyjylary ýaly ähli artykmaçlyklardan peýdalanmaga mümkinçilik berýär. Oňa telefonyň zarýad derejesini we tor baglanyşygyny görmek, gelen habarlara we jaňlara göz aýlamak hem-de soňky ýerine ýetirilen hereketleri yzarlamak girýär. Bularyň hemmesi «Başlat» menýusyna amatly ornaşdyryldy» diýip, Microsoft öz blogunda düşündiriş berdi.
Şeýle hem gyradaky panel arkaly kompýuter bilen Android hem-de iOS mobil enjamlarynyň arasynda faýl alyş-çalşyny amala aşyrmak mümkindir.
