Leonardo da Winçiniň “Mona Liza” (“Jokonda”) suraty Luwr muzeýiniň aýratyn zalyna geçiriler. Bu barada Fransiýanyň Prezidenti Emmanuel Makronyň beýanyna salgylanyp, BFM TV fransuz teleýaýlymy habar berýär.
Häzirki wagtda Leonardo da Winçiniň suraty XVI asyryň wenesiýaly ussatlarynyň eserleri bilen bilelikde Luwryň “Jokonda zaly” hökmünde-de belli bolan 711-nji zalynda ýerleşýär. Bu Luwryň iň uly zalydyr. Bu ýere gelýän adamlaryň sanynyň köpdügi sebäpli suraty görüp bolmaýar diýen ýaly: 2023-nji ýylda “Jokondaly” zala her gün 20 müň adam girip gördi.
“Mona Lizany” göçürmek çözgüdi Luwry abatlamak boýunça “Täze Renessans” meýilnamasynyň bir bölegidir. Makronyň aýtmagyna görä, muzeý “gaýtadan işlener, dikeldiler we giňeldiler”, ol “ajaýyp täze girelgä” eýe bolar. Şeýle-de, muzeýiň daş-töwereginiň hem täzelenmegine garaşylýar.
Täze zaly 2031-nji ýyla çenli açmak meýilleşdirilýär.
The Guardian neşiri Fransiýanyň Prezidentiniň medeniýet ministri Raşid Datä 2026-njy ýyldan daşary ýurtly myhmanlar – Ýewropa Bileleşiginiň raýatlary bolmadyk syýahatçylar üçin giriş petekleriniň bahasyny ýokarlandyrmak boýunça meýilnamany taýýarlamagy tabşyrandygyny ýazýar. Neşiriň belleýşi ýaly, täzelenmeden soň Luwr ýylda 12 mln töweregi myhman kabul edip biler – häzir muzeýe her ýyl 9 mln adam baryp görýär.
