Beýik Britaniýada iki ýüzden gowrak kompaniýa dört günlük iş hepdesine geçdi. Täze tertip boýunça işleýän guramalaryň işgärleri kanagatlanma derejesiniň ýokarlanandygyny belleýär diýip, The Guardian habar berýär.
Tertibiň üýtgedilmegi marketing, tehnologiýa we haýyr-sahawat pudaklaryndaky guramalara täsir etdi. 4 Day Week Foundation-yň müdiri Jo Raýlyň pikiriçe, häzirki iş hepdesi “ýüz ýyl ozal oýlanyp tapyldy we häzirki hakykata laýyk gelýär”. Ol täze tertip adamlary has bagtly, olaryň zähmetini bolsa has öndümli edýär diýip hasaplaýar.
Muňa garamazdan, JPMorgan Chase we Amazon ýaly uly kompaniýalar ofisde hökmany bolmak şerti bilen adaty bäş günlük iş düzgünini saklaýar.
Spark Market Research kompaniýasynyň gözlegi 18-34 ýaş aralygyndaky adamlaryň dört günlük iş hepdesini işjeň goldaýandygyny görkezdi. Olaryň 78%-i munuň bäş ýylyň içinde kada öwrüljekdigine ynanýar we öňki iş modeline dolanmak islemeýär.
“Şeýle-de, bu topar psihiki sagdynlygyň we umumy ýagdaýyň gowulaşmagynyň özleri üçin has möhümdigini, şonuň üçin dört günlük iş hepdesiniň, hakykatdanam, uly peýdadygyny we olaryň umumy ýaşaýyş hiliniň esasy şertidigini aýdýar” – diýip, Spark-yň dolandyryjy müdiri Linsi Kerolan belleýär.
