Hytaýyň Alibaba kompaniýasynyň bulut tehnologiýalary bölümi Alibaba Cloud "Qwen2.5-Max" atly täzelenen we uly göwrümli dil modelini hödürledi. Täze emeli aň modeli Mixture-of-Experts (MoE) arhitekturasy esasynda döredilip, 20 trilliondan gowrak token bilen türgenleşdirildi. Işläp düzüjileri bu guralyň «aň mümkinçiliklerinde uly ösüş gazanandygyny» nygtap, onuň ulanylmaga taýýardygyny belleýärler. Bu barada amerikan neşiri VentureBeat habar berýär.
Modeliň täze wersiýasy has ýokary öndürijiligi we takyklygy bilen tapawutlanýar. Ol teksti seljermek, terjime etmek we mazmun döretmek ýaly çuňňur düşünmegi talap edýän wezipeleri has gowy ýerine ýetirýär.
«Qwen2.5-Max çylşyrymly soraglary işlemek we degişli jogaplary bermek boýunça ep-esli öňegidişlik gazandy» diýip Alibaba Cloud öz blogynda mälim edýär.
Qwen2.5-Max modeli MMLU-Pro, LiveCodeBench, LiveBench we Arena-Hard ýaly esasy synaglarda barlanyldy. Netijede, Arena-Hard, LiveBench we LiveCodeBench synaglarynda DeepSeek V3-den öňe geçdi, MMLU-Pro boýunça bolsa bäsdeşlige ukyply netije görkezdi. GPT-4o we Claude-3.5-Sonnet ýaly öňdebaryjy modeller bilen deňeşdirilende bolsa, Qwen2.5-Max öňdebaryjy ornuny tassyklady.
Alibaba Cloud Qwen2.5-Max modelini öz bulut hyzmatlaryna ornaşdyrmagy meýilleşdirýär. Bu bolsa täze modeli müşderilere maglumatlary awtomatlaşdyrmak, müşderi bilen baglanyşykly işleriň hilini ýokarlandyrmak we biznes proseslerini optimizasiýa etmek ýaly ugurlarda ulanmaga mümkinçilik döreder.
Emeli aň modeli häzirki wagtda Qwen Chat hyzmaty arkaly elýeterlidir. Ulanyjylar bu platformada Qwen2.5-Max bilen aragatnaşyk döredip, onuň mümkinçiliklerini synap bilerler. Şeýle hem, programmistler üçin API arkaly ulanmak mümkinçiligi hem elýeterlidir. Bu hyzmatdan peýdalanmak üçin Alibaba Cloud platformasynda hasaba durmaly, Model Studio hyzmatyny işjeňleşdirmeli we API açaryny döretmeli.
