Beýik Britaniýada ultrases barlagyny ulanyp, depressiýany, garaguş keselini we beýleki näsazlyklary bejermäge ukyply özboluşly beýni implantatyny synagdan geçirmäge taýynlyk görülýär diýip, The Guardian habar berýär.
Forest 1 beýni implantaty Amerikanyň Forest Neurotech guramasy tarapyndan işlenip düzüldi.
Enjam kelleçanagyň aşagynda goýulýar, ýöne beýniniň dokumalaryna aralaşmaýar. Ol adaty MRT-den 100 esse jikme-jik skaner edýär. Çip neýronlaryň gan aýlanyş boýunça işjeňligini seljerýär we işjeňlik ýeterlik bolmasa, ony fokusirlenen ultrases arkaly bilen stimulirleýär. Implantat beýniniň birbada birnäçe ýerine täsir edýär, bu bolsa ony analoglaryndan tapawutlandyrýar.
Bahasy 6,5 million ýewro (8 million dollar) bolan taslama Britaniýanyň ARIA guramasy tarapyndan maliýeleşdirilýär. 30 näsagda geçiriljek synag 2025-nji ýylyň mart aýynda başlar we 3,5 ýyl dowam eder. Birinji tapgyrda synag, operasiýa zerurlygyny aradan aýyrmak üçin, açyk kelle-beýni şikesli näsaglar bilen geçiriler.
Tehnologiýada ultrasesden ýaňa gyzmak ýaly käbir çözülmedik meseleler bar. Şeýle hem beýni işjeňliginiň maglumatlaryny saglyk ätiýaçlandyrmasyna, işe ýerleşmesine täsir etmek ýa-da adamlaryň keýpini dolandyrmak howpuny döretmek ýaly ahlaksyz ulanmagyň töwekgelçilikleri ara alnyp maslahatlaşylýar.
Alymlar implantatyň, agyr keselli näsaglara elýeterli bolar ýaly, howpsuzlygyny tassyklamak isleýärler.
