Ýapon topary konditerçilik sungaty boýunça geçirilen dünýä çempionatda ýeňiş gazandy diýip, CNN habar berýär. Bu ýaryş 20-21-nji ýanwarda Fransiýada geçirildi.
Bäsdeşler üç görnüşde süýji tagamlary taýýarladylar: doňdurylan tagamlar, restoran tagamlary (bu tagamyň içine eminler tarapyndan öňünden taýýarlanan içligi goşýarlar) we şokoladly tagamlar. Esasy maksat – hödürlenýän tagamlarda öz ýurtlarynyň medeniýetini görkezmekdi. Her toparyň işini tamamlamagy üçin bäş sagat wagt berildi. Eminler ýaryşda tagama, hödürlenşiň özboluşlulygyna we dizaýna baha berdiler.
Ýapon konditerleri oýnawaç görnüşinde erikli süýjini, şeýle hem limon, armyt we merjen gülüni ulanyp, asanoha däp-dessuryny ýatladýan nagyşly şokolady taýýarladylar.
Ikinji orny şokoladly ýumurtgalary bilen Fransiýa aldy. Üçünji orny bolsa sitrusly we erikli süýjüsi bilen bilen Malaýziýa eýeledi.
Beýleki gatnaşyjylar hem tapawutlanmaga çalyşdylar. Mysal üçin, hytaý topary aždarha şeklinde, meksikanlar bolsa mekgejöweni we şokolady garyşdyryp süýji taýýarladylar.
Bäsdeşler özboluşly egin-eşikleri bilen hem üns çekdiler: fransuzlar däp bolan breton köýneklerini we berelerini geýdiler, meksikanlar süýji kelle maskalaryny dakyndylar, britanlar bolsa gazetçi papaklaryny geýip, galstuk-baboçkalaryny dakdylar.
Soňky netijelerde bolsa galan orunlar şu tertipde paýlandy: Hytaý, Belgiýa, Italiýa, Günorta Koreýa, Singapur, Beýik Britaniýa we Argentina.
