Ýaponiýanyň Hökümeti we BMG-niň Ösüş Maksatnamasy (BMGÖM) Gazagystanda Kaspi deňziniň suwunyň derejesiniň peselmegine garşy çärelere gönükdirilen 3 million dollar gymmatyndaky täze taslama badalga berýärler.
Gazagystan Respublikasynyň Ekologiýa we tebigy serişdeler ministrligi hem-de Suw serişdeleri we irrigasiýa ministrligi bilen bilelikde durmuşa geçiriljek bu başlangyç suw serişdelerini dolandyrmagy kämilleşdirmäge, monitoring ulgamlaryny döwrebaplaşdyrmaga we döwletara hyzmatdaşlygy berkitmäge niýetlenendir.
Taslama Merkezi Aziýa bilen Kawkazyň arasyndaky möhüm ulag we ekologiýa geçelgesiniň ekologik durnuklylygyny ýokarlandyrmagy maksat edinýär. Bu başlangyç, şeýle hem Ýaponiýanyň Hökümetiniň «Merkezi Aziýa + Ýaponiýa» dialogynyň we sammitiniň çäklerinde mälim eden Hazarüsti halkara ulag ugruny ösdürmek boýunça ädimlerini goldaýar.
Kaspi deňzi howanyň üýtgemegi, temperaturanyň ýokarlanmagy, suwuň bugarmasy we derýa akymlarynyň azalmagy sebäpli çalt guraýar, bu bolsa onuň özboluşly biodürlüligine we millionlarça adamyň abadan durmuşyna gönümel howp salýar.
Gazagystanyň Ekologiýa we tebigy serişdeler wise-ministri Mansur Oşurbaýewiň belleýşi ýaly, deňziň derejesiniň peselmegi sebitiň ekoulgamyna we ykdysady işjeňligine toplumlaýyn ýaramaz täsir edýär.
Bu taslamanyň monitoring ulgamlaryny, aýratyn hem Kaspiniň gowşak we howp astyndaky demirgazyk böleginde hem-de oňa guýýan derýalaryň ýakalarynda berkitmäge kömek etjekdigi aýratyn bellenilýär.
