26-27-nji ýanwarda Türkmenistanyň daşary işler ministriniň ýolbaşçylygyndaky türkmen wekiliýetiniň Özbegistana saparynyň çäklerinde Özbegistanyň Prezidenti Şawkat Mirziýoýew Raşid Meredowy kabul etdi. Bu barada Türkmenistanyň DIM-niň metbugat gullugy habar berýär.
Söhbetdeşligiň başynda Türkmenistanyň daşary syýasat edarasynyň ýolbaşçysy Özbegistanyň Prezidentine Türkmenistanyň Prezidenti Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň salamlaryny ýetirdi.
Söhbetdeşligiň barşynda syýasy-diplomatik, söwda-ykdysady, medeni-ynsanperwer ugurlar boýunça türkmen-özbek ikitaraplaýyn hyzmatdaşlygyny mundan beýläk-de ösdürmeginiň möhüm meseleleri ara alnyp maslahatlaşyldy.
Şeýle hem sebitara we halkara gün tertibiniň möhüm meseleleri, şol sanda ikitaraplaýyn we köptaraplaýyn formatlaryň çäklerinde meýilleşdirilýän çäreler barada pikir alyşmalar boldy.
