Hindistanyň iň baý adamy Mukeş Ambani Gujarat ştatynyň Jamnagar şäherinde dünýäniň iň uly maglumat merkeziniň gurulýandygyny habar berdi. Milliarderiň ýolbaşçylygyndaky Reliance Group kompaniýasy bu taslama 20 milliard bilen 30 milliard dollar aralygynda maýa goýýar diýip, The Economic Times gazeti habar berýär.
Täze maglumat merkeziniň kuwwaty 3 GWt-a çenli bolar, bu häzir dünýädäki iň ýokary kuwwat bolan 600 MWt-dan (Wirjiniýadaky Microsoft maglumat merkeziniň kuwwaty şunuň ýaly) ep-esli ýokarydyr.
Merkez emeli aň üçin zerur bolan köp mukdardaky maglumatlary gaýtadan işlemek üçin Nvidia çiplerini ulanar.
Şeýle hem Reliance Group gaýtadan dikeldilýän energiýa çeşmelerini ulanmagy meýilleşdirýär, ýöne çeşmeler adaty energiýa çeşmelerinden peýdalanmakdan doly gaça durmagyň kyn boljakdygyny aýdýarlar.
Ambaniniň taslamasy öz göwrümi we hyjuwy bilen Microsoft, Alphabet we Amazon ýaly kompaniýalaryň global başlangyçlaryndan tapawutlanýar. Geçen hepde OpenAI, SoftBank we Oracle ABŞ-nyň AI infrastrukturasyna 100 milliarddan 500 milliard dollar aralygynda maýa goýmak meýilnamasyny yglan etdiler, emma maglumat merkezini döretmek babatda entek anyk belli zat ýok.
Täze maglumat merkeziniň Hindistanyň häzirki wagtda 1 GWt-danam pes bolan maglumat merkeziniň umumy kuwwatyny artdyrmaga kömek etmegine garaşylýar.
Ambani agressiw iş syýasaty bilen tanalýar. Ol simsiz aragatnaşyk hyzmatynyň bahasyny birnäçe gezek arzanlatdy, bu bolsa birtopar bäsdeşleriň bazardan gitmegine sebäp boldy. Indi ol emeli aň giňişliginde şuňa meňzeş taktikany ulanýar we arzan bahadan hasaplaýyş hyzmatlaryny berjekdigini wada berýär. Bu her sargytsaýy hasaplaýyş çeşmeleriniň bahasy ýokarlanýan OpenAI ýaly kompaniýalar üçin aýratyn möhüm bolan AI bilen baglanyşykly amallaryň çykdajylaryny ep-esli azaldyp biler.
