Şu gün Türkmenistanda Watan goragçylarynyň güni bellenilip geçilýär. Baýramçylyk mynasybetli Prezidenti Serdar Berdimuhamedow harby we hukuk goraýjy edaralarynyň harby gullukçylaryny hem-de işgärlerini gutlady.
"Bu baýram eziz Watanymyzyň mukaddes Garaşsyzlygyny, özygtyýarlylygyny, çäk bitewüligini, konstitusion gurluşyny, döwlet serhedimiziň mizemezligini goraýan, ýurdumyzyň howpsuzlygyny, jemgyýetçilik asudalygyny, milli kanunçylygymyzy hem-de hukuk tertibini üpjün edýän harby we hukuk goraýjy edaralaryň harby gullukçylaryna, işgärlerine bildirilýän uly ynamy, belent sarpany, olar hakynda edilýän çuňňur aladany giňden dabaralandyrýar" diýip, döwlet Baştutany belleýär.
Serdar Berdimuhamedow 2024-nji ýylyň güýzünde Türkmenistanyň Goranmak ministrliginiň Berdimuhamet Annaýew adyndaky 1-nji Ýöriteleşdirilen harby mekdebiniň täze binalar toplumynyň açylyp ulanmaga berilmegini harby hünärmenleri kemala getirmekde uly ähmiýete eýe bolan waka hökmünde belläp geçdi.
Döwlet Baştutany Watan goragçylaryna ýüzlenip, "Siziň mukaddes Garaşsyzlygymyzy, döwletimiziň halkara derejede iki gezek ykrar edilen hemişelik Bitaraplyk hukuk ýagdaýyny, milli gymmatlyklarymyzy goramak ýaly belent borçlara wepaly boljakdygyňyza, gerek bolsa, bu mukaddeslikler üçin şirin janyňyzy hem gaýgyrmajakdygyňyza berk ynanýaryn" diýip, belläp geçdi.
