Russiýa Federasiýasynyň B.B.Gorodowikow adyndaky Galmyk döwlet uniwersitetiniň we Magtymguly adyndaky Türkmen döwlet uniwersitetiniň, şeýle hem Türkmenistanyň Bilim ministrliginiň wekilleriniň gatnaşmagynda onlaýn-duşuşyk geçirildi.
"Türkmenistan: Altyn asyr" elektron neşiriniň habar bermegine görä, duşuşygyň barşynda taraplar hyzmatdaşlygy ösdürmek meselelerini maslahatlaşdylar.
B.B.Gorodowikow adyndaky Galmyk Döwlet uniwersitetiniň rektorynyň wezipesini ýerine ýetiriji Ý.Mantaýewa rus ýokary okuw mekdebiniň taryhy we şu güni barada gürrüň berdi.
Magtymguly adyndaky Türkmen döwlet uniwersitetiniň okuw işleri boýunça prorektory D.Annaýew çykyşynda dürli ýyllarda uniwersitetiň täze okuw binalarynyň açylandygy we onuň maddy-enjamlaýyn binýadynyň pugtalandyrylandygy, şeýle hem ýokary derejeli hünärmenleri taýýarlamak boýunça alnyp barylýan işler hem-de bu ulgamda halkara hyzmatdaşlygyň ähmiýeti barada gürrüň berdi.
Galmyk döwlet uniwersitetiniň halkara hyzmatdaşlygy, hünär we goşmaça bilim boýunça prorektory O.Koniýewa iki ýurduň ýokary okuw mekdepleriniň arasyndaky hyzmatdaşlyk gatnaşyklarynyň ösdürilişi barada aýdyp, bilim maksatnamalarynyň durmuşa geçirilişiniň ugurlarynda, şol sanda iki diplomlyk maksatnamasy, professorlar, mugallymlar hem-de talyplar üçin akademiki maksatnamalar babatda özara gatnaşyklary ýola goýmagyň maksadalaýyk boljakdygyny belledi. Şeýle hem hünär derejelerine degişli maksatnamalaryň çäklerinde umumy sapaklary bermäge daşary ýurt mugallymlaryny çekmek boýunça teklipler beýan edildi.
