Beýik Britaniýanyň Westminster uniwersitetiniň wekilleri Seýitnazar Seýdi adyndaky Türkmen döwlet mugallymçylyk institutynyň mugallymlarynyň we talyplarynyň gatnaşmagynda okuw sapagyny geçdiler. Iş saparynyň çäklerinde britan uniwersitetiniň wekilleri 19-25-nji ýanwarda ýurdumyzyň ýokary okuw mekdeplerinde birnäçe duşuşyklary geçirdiler.
23-nji ýanwarda Türkmenistanyň ýokary okuw mekdepleri bilen hyzmatdaşlygyň çäginde Westminster uniwersitetiniň wekilleri Seýitnazar Seýdi adyndaky Türkmen döwlet mugallymçylyk institutynda 4 tapgyrdan ybarat okuw sapagyny geçirdi. Okuw sapagyny Westminster uniwersitetiniň professorlary Endrýu Linn Robert we Anastasiýa Bezborodowa alyp bardy.
Sapagyň dowamynda iňlis dili mugallymlarynyň we iňlis dilini öwrenýän talyplaryň döwrebap usullardan peýdalanyp, bilimlerini kämilleşdirmek, ylmyň we tehnologiýalaryň soňky gazananlaryny okuw işinde netijeli ulanmak, dil bilimi bilen baglanyşykly ylmy gözlegleri alyp barmak we bu gözlegleriň netijeleriniň ylmy makalalarda şöhlelenmegini gazanmak ýaly wajyp meseleler ara alnyp maslahatlaşyldy.
Saparynyň çäklerinde myhmanlar Magtymguly adyndaky Türkmen döwlet uniwersitetine we Halkara ynsanperwer ylymlary we ösüş uniwersitetine baryp gördüler.
