Germaniýaly aerokosmos inženeri Rýudiger Koh suwuň ýüzüne çykmazdan, onuň astynda uzak wagtlap galmak boýunça dünýä rekordyny täzeledi. Ol Panamanyň kenarlaryna ýakyn ýerleşdirilen ýörite kapsulada 120 gün ýaşady diýip, France-Presse habar berýär.
Onuň, takmynan, 30 inedördül metr meýdanly “jaýy” 11 metr çuňlukda ýerleşip, krowat, hajathana, telewizor, kompýuter, welotrenažor, internet we birnäçe wentilýator bilen üpjün edildi. Elektrik energiýasy Gün batareýalary bilen öndürildi, inženeriň ätiýaçlyk generatory hem bardy. Bu kapsula suwüsti otag bilen birleşdirilip, onuň üsti bilen Koha azyk önümleri iberildi.
“Bu üýtgeşik kyn däl. Men özümi bu ýerde ejir çeken ýaly duýamok, bir agyr düşen zat, käwagt daýwing bilen meşgullanasyň gelýändigi boldy” – diýip, inžener aýtdy.
Koh kapsulada sazlaşykly durmuşy alyp barandygyny we suwasty gurşawyň ýaşaýjylary barada wideo materiallary ýygnandygyny, şeýle-de sport bilen meşgullanyp, kitap okandygyny gürrüň berdi.
Kapsulada dört kamera ýerleşdirildi we olar Kohuň gündelik durmuşyny ýazga alyp, onuň psihiki saglygyna gözegçilik etdi. Şeýle-de, olar inženeriň bir gezek hem ýokary çykmandygyna subutnama boldy.
Ýatlap geçsek, 59 ýaşly Rýudiger Koh geçen ýylyň 26-njy sentýabrynda Panamada Puerto-Lindonyň kenaryna ýakyn ýerde suw astyna çümdi.
Öňki rekord suw astynda 100 gün ýaşan amerikaly Jozef Diturä degişlidi.
