Hytaý DEEP Robotics kompaniýasy Lynx atly robot itini tanyşdyrdy. Bu robot it tans etmegi, kyn päsgelçiliklerden geçmegi we örän agyr şertlerde işlemegi başarýar diýip, Interesting Engineering neşiri habar berýär.
DEEP Robotics kompaniýasy YouTube sahypasynda dört aýakly Lynx robot itiniň mümkinçiliklerini görkezýän wideony paýlaşdy. Ilkinji gezek 2024-nji ýylyň noýabr aýynda tanyşdyrylan bu robot it, pyýada hereket edýän robotlaryň çeýeligini we tigirli ulaglaryň tizligini özünde utgaşdyrýar.
Lynx robot itiniň esasy aýratynlygy – onuň dürli ýer gurluşyna uýgunlaşyp bilýänligidir. Onuň aýak uçlarynda tigirler bar, şol sebäpden ol pyýada ýöreýiş we tigirli hereket režimleriniň arasynda birinden beýlekisine derrew geçmegi başarýar.
Wideo ýazgylardan görnüşi ýaly, robot it ajaýyp ukyplaryny görkezipdir: ol buzda aňsatlyk bilen typýar, çuň garlary ýeňip geçýär, 80 sm beýiklikdäki gaýalara böküp çykýar we ýiti eňňitlerden aşak düşýär.
Inženerler Lynx robot itini akylly dolandyryş algoritmleri bilen üpjün edipdirler. Ol 45° burçly eňňitlere çykmagy başarýar.
Robot it IP54 derejeli gorag bilen üpjün edilen. Ol üç sagatlap zarýadsyz işläp bilýär we batareýasyny tiz çalyşmaga mümkinçilik berýär.
DEEP Robotics kompaniýasy Lynx robot itini dürli kyn meseleleri çözmek üçin köp maksatly enjam hökmünde hödürleýär. Ony halas ediş operasiýalaryndan başlap, elýeterli bolmadyk ýerlerde ylmy barlaglar geçirmek üçin hem ulanyp bolýar.
Robot itiň bahasy 17999 dollar.
